من روائع الشاعر ابهاب محمد اسماعيل
( ايهاب المغربي)
انا عايش كده سايب نَفسي
ع الارض ف دَمي ومِن يأسي
مَركون ع الحيط ساكِت مَنسي
وكانِّي انا سَمَكه ومن نَحسِي
المُوجَه رَمِتني ورا المَرسَى
ماسِك أحلامي الوَرديَّه
وبقلمي بظلِّلها بِغيَّه
من (وردي) رُمادي وبُنِّيَّه
والغُصن الطَّالع م المَيَّه
بارميه في البَحر واعيش وانسَى
كان ليَّه قَصايِد عن بُكْرَه
بتقول غير حَبِّيت او باكُرَه
من تالتَه عدادي وكان ذِكْرَى
خَرَّجتُها يمكِن آخُد فِكْرَه
عن قلمي المَقصوف في النَّكْسَه
وسافِرت طفولتي المَعجونَه
بسَذاجة وأفكار مَشحونه
وف وسط حروفها المَجنونَه
كَهربت الغُربَه المَلعُونَه
وركِبت بقَلَمي على الفَرَسَه
ورفعتُه كَرُمح قُصاد الرِّيح
وطَلَقت عَنان الفَرَسَه تِطِيح
ومسِكت ف عُرْف الفَرَسَه جَريح
عاضِضْ على قلب بدَمُّه صَريح
بيدُق ويحلِف ما هيّنسَى
وتمّر الأيام وترَوَّح
والقلب الصَّابِر يتجَرَّح
بين لِيلَه ولِيلَه بيِتطَوَّح
ولا بَدر يتِم ويتصَلَّح
ولا فَجر يشَقشَقها فيِرسَي
ليست هناك تعليقات:
إرسال تعليق